白菌忌廉湯

【白菌忌廉湯】4-6人

我好鐘意煮磨菇濃湯飲，加埋松露冇得彈，但屋企小老闆竟然話太多菇菇唔鐘意飲，寧願飲街坊茶餐廳嘅常餐嗰種用湯粉開嗰D湯......唉.....玩嘢咩....好，就整比你啦......自己整總好過街嗰D嘛......材料簡單，快、靚、正又好味

食譜


材料：白菌。兩盒(1盒切碎、1盒切片)
            洋蔥。半個(切碎)
            麵粉。6湯匙
            牛油。50g
            牛奶。150ml
            淡忌廉。200ml
            雞湯。800ml
            胡椒粉。少許
做法：落牛油炒香洋蔥至香味出，落白菌炒至軟身，逐湯匙加入麵粉，炒至冇粒粒粉，再逐少落雞湯，邊攪邊落，煲至滾起再落牛奶，轉中火煲至開始有少少杰身，再落淡忌廉，煮至你喜歡杰度，試味，食得。