白酒忌廉煮青口

【白酒忌廉煮青口】
本身好鐘意食法國藍青口，鮮甜、海味咸、軟滑，間唔使都會去cc叔婆度買嚟煮吓，白酒呀，清酒呀，白汁呀，唔.....超正.....今日正出發去尖咀中，朋友來電說原來响樂富街市都有新鮮紐西蘭青口賣，紐西蘭青口大大隻冇乜好感，怕會鞋肉(生蠔最怕食大大隻)，朋友極力叫我試話好滑，價錢係50蚊斤，嘩......法藍一包都要$180包，好....即調頭去樂富先，街市好乾淨，行到最大間海產店，嘩....法國藍龍蝦都有得賣，勁呀，見到紐西蘭青口$48斤，唔該：要百蚊啦，今晚就整白酒忌廉青口啦，唔使20分鐘就煮完勁方便嘅餸，個汁真係好好味呀，用嚟點麵包超正，講番個青口先，肉身好滑，大大隻啖啖肉，不過唔係我杯茶...食兩三隻已經頂住個胃...喜歡啖啖肉嘅朋友啱晒。

材料：紐西蘭青口 兩斤
            牛油。50g
            洋蔥。半個切細片
            蒜頭。兩粒切碎
            蕃茄。細兩個切粒
            白酒。200ml
            淡忌廉。150ml
             胡椒粉。少許 ， 芫茜。少許
做法：落牛油落洋蔥炒至軟身香味出，再落蒜頭粒炒香，轉大火放青口炒勻加蓋焗1分鐘，開蓋加白酒炒勻，等酒精蒸發約3分鐘，落忌廉炒勻再落番茄粒，加蓋焗至青口全開，如已有開口可先拎起，避免過熟，尾段全開口可熄火，放回之前拎起青口，加胡椒粉同芫荽撈勻，試味。食得 。