魚仔年糕

【魚仔年糕】

好耐冇試過瞓到中午自然醒，爽呀🤣....精神晒...放假有乜攪作好？行街又多人又迫🤔，之前幾日都見人响卜卜度比人洗版，鯉魚年糕....，d人整得好得意，成日都想試整，一於今日就攪佢啦....食個Lunch就出油麻地買料..順手睇吓有冇🍒買先，响上海街買完魚模....再行埋隔離街果欄..嘩..多人到好似行年宵市場咁....喳喳林買完🍒即走，寶石30-32m...承惠＄580 ...都幾貴吓.🤔...不過我家小老闆話要食又肯陪我出嚟買嘢，好啦... 買啦.😅......返到屋企即開工，上網搵咗好多資料，都唔難攪呀，開始整第一轉時未熟手，硬係唔多靚，自己食鬼咗去，第二轉開始捉到竅門，越整越好玩，終於整咗幾十條魚仔年糕，我覺得好似返學上美術課咁，其實我好鐘意DIY，好有滿足感。🤣🤣🤣整完真係好鬼靚，有D唔捨得食....不過小老闆就係咁食......

材料(30條小魚)

「A」澄麵。200g
「B」糯米粉。460g
「C」砂糖。350g，水。160g
「D」椰漿。900g
「E」菜油。少許（搽魚模）
「F」食用色素：紅色、橙色，食用金泊：片或粉
做法：
「1」先將砂糖和水用小火煮溶，倒入椰漿中攪勻待用。
「2」澄麵和糯米粉隔篩落大碗中，將椰漿倒入攪成白麵糊，冇粉粒。
「3」麵糊再隔篩變幼滑，從中倒出兩小碗,每碗約100g，分別加入食用色素紅色和橙色，少許兩三滴已可。
「4」用鑊煲起水，魚模塗上薄薄油，用小匙將色素糊不規則倒入魚模中，蒸兩分鐘，拎出再倒入白麵糊，蒸25-30分鐘，拎出涼一會，脫模，掃上金箔，眼睛可用紅色素畫上。