【老陳皮冰糖燉檸檬】

【老陳皮冰糖燉檸檬】

之前有試過用低溫慢煮法去做燉檸檬🍋，非常方便，但有些朋友未必屋企會有慢煮棒，咁啱有個好朋友屋企人响澳洲嚟咗香港，仲拎埋自家種植有機西西厘檸檬過嚟香港做手信😍，隻隻大過我拳頭，外國種類真係唔同D，大大隻都幾香，咁梗係唔好嘥整返個老陳皮冰糖燉檸檬啦🍋，整定幾樽放响度，熱氣、捱夜、夜咳、唔夠瞓食一匙、包你成個人順晒氣.....正👍....今次都係用上過三十年嘅老陳皮，其實我真係好鍾意聞陳皮嗰陣味😂，越舊越香，雖然响出面買30幾年老陳皮每両要成＄200 ，不過自己食當然要用好嘢啦，今次用蒸爐燉，全程都係加一次水就夠，都係臨瞓前放入去就得，我係用26cm煲，最盡可以一次過做四樽32安士樽裝份量，大約用四包冰糖份量(每包約350g)，檸檬同冰糖係1:1，老陳皮用了2両左右，燉足18個鐘，做法非常簡單。

🍋新鮮的檸檬味酸，微甘，性微寒，具有清熱解暑、生津止渴、和胃降逆及化痰止咳的功用，而現代中醫大多會使用檸檬，治理暑熱煩渴、胃熱傷津、口渴喜飲、胃氣不和、嘔吐少食及痰熱咳嗽等問題。
🍊陳皮有理氣健脾、燥濕化痰的作用，而性味為辛、苦、溫，所以可以治療風寒型痰多咳嗽。🍬冰糖則有補中益氣、和胃潤肺、化痰止咳的作用，而性味為甘平，以治療熱燥的咳嗽為
主。
PS：可沖水飲用、或可直接食一匙。

1.  材料：1400g檸檬、1400g冰糖、75g老陳皮，檸檬用鹽洗乾淨，風乾檸檬，不要核子，再切成粒粒，陳皮浸軟挖囊，然後切絲，冰糖打碎。

  2.    做法：用煲放入一層檸檬、一層冰糖、一層陳皮，重複此做法至放入所有材料。

   3.   放入所有材料至滿，蓋上蓋，我用Miele蒸爐做，燉足18個鐘只需要加一次水，當蒸爐溫度上至100度時，轉為90度，水箱就可以維持9小時，所以只需加一次水就可以再長時間，亦可用普通燉盅，但小心留意水乾。

4.   準備玻璃瓶洗乾淨用熱水泡一會，或洗完可放入焗爐用約100度焗10分鐘，作為消毒，檸檬做好後，即可分樽裝好，倒轉放置，等樽內空氣排出成真空狀態，放置陰涼地方，可放半年都沒問題。

庶汁馬蹄糕

【庶汁馬蹄糕】

臨近過年，大家都不停埋頭苦幹整GO GO , 我自己本身係超愛食蘿蔔糕、馬蹄糕，間唔時都會自己整定底放雪櫃，隨時都可以煎嚟食，蘿蔔糕自覺自己整都係一般(不過自己都食晒成底），馬蹄糕比較有信心D·，唔太甜又清香，自己都讀自己，不過次次都撞唔起，都係要煮先起到糊，手都軟，好彩今次有靚仔廚師機幫手，果然冇有怕，唔使一粒鐘就攪掂，真係好好味㗎，快D試整吓啦。材料非常簡單，竅門就係糖水一定要夠熱先可以撞得起成糊，馬蹄切成片狀，食時仲有爽口感，泰國椰糖香而不過甜，庶汁我用鴻福堂庶汁茅根，清涼冇咁熱氣，原庶汁糖份太高，味道蓋過馬蹄，真係食多幾塊都唔厭。😋😋😋

用個高身大不鏽鋼兜撞糊，方便好多，唔怕整親自己

撞完即用廚師機幫手攪，又夠力又平均

呢個份量可以做到四盒左右

 【庶汁馬蹄糕】食譜 （約四盒份量）
材料：馬蹄粉          480g
            馬蹄肉          800g (大約街市己切好皮兩包多D）
            泰國椰糖      300g
            庶汁茅根A    800g ( 同馬蹄粉攪勻）

            庶汁茅根B    2000g
做法：

1. 馬蹄肉切片，用清水浸。
2. 庶汁B煮熱加椰糖煮溶，再加入馬蹄肉用中火煮熱。
3. 用高身不鏽鋼兜落馬蹄粉用庶汁A攪勻至冇粉粒。
4. 將 [2] 加大火煮至滾，馬蹄粉再次攪勻，將[2]直接倒落已開粉之不鏽鋼兜內，此時兜內應成漿狀，即放入機中攪至熱力平均成杰身糕型狀，蒸盒內掃上油，倒入蒸盒中，蒸約40分鐘便可。
5. PS：如[4]撞不起，可放回爐上用中火，邊煮邊攪拌成杰身也可。
6. 蒸完待涼，放入雪櫃一晚，再切片大火煎，食得。 

鮑魚響螺燉雞湯（慢煮版）

【鮑魚響螺燉雞湯】

近期天氣又凍番⛄😱，係時候要補一補先，湯水中我比較喜歡燉湯做法，營養流失比較少，湯清而味濃，補而不燥，而用慢煮法既可慳煤氣（電用量很少），又唔需要睇火免怕煲乾水，還可開機一次，做定多樽不同燉湯，想日日有靚湯飲絕不成問題啦😋，啱晒兩口子或小家庭，慢煮法可做到真空狀態，預早做定放置室溫一星期都不成問題，飲時煲熱加鹽即可，簡單方便，家人勁贊.....(加薪有望啦）💯😍😍😍

材料： 
64oz 一個， 2隻雞脾，1隻青邊鮑，2隻急凍響螺，85C˚4小時。

做法：先將雞去皮斬件飛水，青邊鮑、響螺開邊，用薑蔥飛一飛水，之後全部放晒落個樽度，加熱水去到樽頸，開機、等食..

慢煮銀鱈魚

【慢煮銀鱈魚】Sous Vide Black Cod

用Sous Vide 煮魚，可防止魚肉過熟變嚡口，保持魚質嫩滑，用於西餐較適合，中餐講究熱食，而銀鱈魚入口即化， 肉質非常細膩， 有獨特的清香和鮮味，銀鱈魚一般比較適合大陪分人食用， 分別是孕婦產婦、嬰幼兒、青少年、白領、中老年人。

因為銀鱈魚所富含“魚油”， 而魚油的主要成分是不飽和脂肪酸，同時不飽和脂肪酸分別是由DHA和EPA組成， 其中DHA可以健腦明目、增強記憶力、促進腦部發育、預防憂鬱症、緩解壓力。

而EPA則可以降低血脂血壓學粘度、防治關節炎、改善情緒和安胎的作用， 這個都是這五類人群所最需要的。(以上為維基解說)

銀鱈魚需魚油重，煎香不嚡身，慢煮方法同樣用作制三文魚都非常之好食，三文魚熟食魚肉嚡，但經低溫慢煮後，完全嫩滑，值得一試。

食譜👇😋

慢煮法式油封鴨腿

【法式油封鴨腿 • 慢煮版】

呢個菜式其實材料已經買咗好耐，雖然功夫簡易但時間長，所以一直放响冰櫃度，近期要清清櫃先至的起心肝去做，做西餐菜式或用作炒飯都好鬼正，尤其炸完嘅鴨油用嚟撈麵撈飯或炒菜都好香，而且膽固醇比豬油和雞油還要低，煎煮炒炸都適合，大超市都有罐裝鴨油賣，多數由法國入口，大約$50-$60罐，而我今次做6隻鴨腿，都係用番自己鴨腿脂肪自己炸，健康又慳錢。

油封鴨 Confit de Canard，法國人用鴨油低溫下封煮鴨最少10小時後再煎脆鴨皮，做法材料簡單，除了傳統用煲入焗爐油封煮外(鴨油要浸過面，相對需要多油)，現在可更簡單乾淨少油嘅做法(慳番唔少人力物力)，「Sous Vide」-- 雖然時間長咗，但溫度穩定，用油少好多，可獨立包裝可隨時食用，瞓前放入，瞓醒攪掂，SV 係一個廚房好幫手。

💢

食譜👇😋

【滑蛋炒牛肉】

【滑蛋炒牛肉】🐂

係一味快、靚、正嘅餸😋，好多時諗唔到煮咩就會煮呢個，可伴飯又高營養，滑蛋炒牛肉我諗應該冇咩人唔識煮，不過我家姐姐次次都會炒出嚟嘅蛋係全熟，都好食嘅.....不過D蛋鞋D囉😬，今次教姐姐熄火炒，真係滑好多，同埋我鐘意用牛柳炒，小朋友容易咬D消化容易D，我家雞蛋去貨好快，所以成日雪櫃都有新鮮蛋食，好多人都說湖北蛋比較香，但我比較鐘意食香港蛋，可能就係會比較安心吧！🍳

食譜👇👅

古法蒸鷹鯧魚

【古法蒸鷹錩魚】🐠🐟

鷹錩係錩魚中之王，其魚肉白厚、肉多骨少、魚味濃、不帶腥味，街市內不常有，因鷹鯧一上水就會死，所以漁民捉到就立即冰鮮，但價錢往往都要十幾元一両，越大條身價越貴，比海班還要貴，街市會游水的多數係便宜很多的黃立鯧，如有游水鷹鯧賣，我相信會是天價了。

鯧魚多數人都會是用煎、炸、豉汁蒸方法烹調，但剛過去不久，和家人曾在泰國唐人街一間中菜館食過一種古老方法烹調，家人說這是潮州舊式煮法，香港現在很少人會這樣做，我沒有食魚天份，但家人對魚有些要求，食過此魚後一直念念不忘，回港後也曾有意冇意提過些........好吧.....即上網搵資料參考一下，看見也有好幾種做法，孤注一試啦.....參考幾個資料再混合在一起....應該唔會差呱.....😂😂😂, 好彩當晚冇令家人失望....都又幾好食㗎.....😜😜😜

食譜👇