慢煮法式油封鴨腿

【法式油封鴨腿 • 慢煮版】

呢個菜式其實材料已經買咗好耐，雖然功夫簡易但時間長，所以一直放响冰櫃度，近期要清清櫃先至的起心肝去做，做西餐菜式或用作炒飯都好鬼正，尤其炸完嘅鴨油用嚟撈麵撈飯或炒菜都好香，而且膽固醇比豬油和雞油還要低，煎煮炒炸都適合，大超市都有罐裝鴨油賣，多數由法國入口，大約$50-$60罐，而我今次做6隻鴨腿，都係用番自己鴨腿脂肪自己炸，健康又慳錢。

油封鴨 Confit de Canard，法國人用鴨油低溫下封煮鴨最少10小時後再煎脆鴨皮，做法材料簡單，除了傳統用煲入焗爐油封煮外(鴨油要浸過面，相對需要多油)，現在可更簡單乾淨少油嘅做法(慳番唔少人力物力)，「Sous Vide」-- 雖然時間長咗，但溫度穩定，用油少好多，可獨立包裝可隨時食用，瞓前放入，瞓醒攪掂，SV 係一個廚房好幫手。

💢

食譜👇😋

【法式油去鴨腿】

材料：

鴨腿       ＝＝＝   6 隻

海鹽       ＝＝＝   6 湯匙 （大約一隻一湯匙鹽）

百里香   ＝＝＝   3 棵

蒜頭       ＝＝＝   5 粒（切粒）

黑椒碎   ＝＝＝   1 湯匙

月桂葉   ＝＝＝   8 片

鴨油       ＝＝＝   6 湯匙

做法：

1. 百里香、海鹽、蒜頭、黑椒碎、月桂葉撈勻成香料鹽待用。
2. 鴨腿洗乾淨，除去餘毛，用廚紙吸乾水，剪去鴨腿上多餘脂肪留作炸鴨油。
3. 將香料鹽搽勻鴨腿後放入盒蓋上蓋，放雪櫃醃24小時。
4. 鴨脂肪切成丁塊，炸出鴨油，用碗盛起待用。
5. 鴨腿拎出沖洗乾淨香料鹽，用廚紙抺乾，放入煮食真空袋中，一隻一個袋，再加入1湯匙鴨油，再抽真空，(小心抽真空時抽埋油上去)。
6. 真空機預計在70度 16小時 ，水溫到即可放鴨腿，(通常長時間我都會在晚上做)，
7. 時間到，如是即食可即取出鴨腿，腿皮向下放在平面鑊中大火煎至金黃色大約5分鐘，即可食用。
8. 如不是即食的話，可將鴨腿原包浸泡到凍水降溫至冷卻，即放入雪櫃冷藏可保存2-3星期，食時可用低於70度水浸泡20分鐘再煎即可。