【滑蛋炒牛肉】

【滑蛋炒牛肉】🐂

係一味快、靚、正嘅餸😋，好多時諗唔到煮咩就會煮呢個，可伴飯又高營養，滑蛋炒牛肉我諗應該冇咩人唔識煮，不過我家姐姐次次都會炒出嚟嘅蛋係全熟，都好食嘅.....不過D蛋鞋D囉😬，今次教姐姐熄火炒，真係滑好多，同埋我鐘意用牛柳炒，小朋友容易咬D消化容易D，我家雞蛋去貨好快，所以成日雪櫃都有新鮮蛋食，好多人都說湖北蛋比較香，但我比較鐘意食香港蛋，可能就係會比較安心吧！🍳

食譜👇👅

【滑蛋炒牛肉】

材料：

牛柳                  50蚊(切片)

雞蛋                  5隻

蔥                      1棵(切粒)

雞湯水              50ml

醃牛柳料：

糖                      1茶匙

生抽                  1茶匙

生粉                  1茶匙

水                      1湯匙

調味料：

麻油                  1茶匙

鹽                     少許

做法：

「 1 」先將牛柳洗淨，用廚紙吸乾水份，落糖、生抽攪勻，再落生粉，水要一路攪牛肉逐少逐少加入，再加入少許油醃大約30分鐘。

「2 」雞蛋打勻，加入雞湯攪勻，待用。

「3 」鑊落油至約170度熱，落牛柳炒至眼見牛柳面轉色，拎出待用，鑊不需熄火。

「4 」拎出牛肉後，鑊內再煮熱度去至約180度左右，(手掌感覺慶熱), 落蛋汁、牛肉即熄火，利用鑊內熱力，用筷子圍邊亂推蛋和牛肉，落蔥花，上碟，食得。