【清湯腩】

【清湯牛腩】

已好耐冇過海食清湯腩，好掛住呀😍....正在想念之際，靚仔老細打嚟....「做乜咁耐唔過嚟食爽腩呀？」....唉..😫. 又挑起條筋.....我都想食呀........冇腳同我去食，冇理由自己一條友過去嘛..😪.(雖然靚仔老細成日話一個人嚟食都唔怕啦，識我嘅人都知我最鐘意係食爽腩啦，一個人點食呀？同埋我唔鐘意一個人去食嘢嘅感覺，冇人陪咪寧願唔食...😢...囉....) , 每次去食例必一味 ，唔該「全餐」伙計見親我只問「河呀？」「係」「喱唔喱？」😂，佢哋知我只會食爽腩，真係由細食到大，講吓講吓都有成廿年以上，講番先，冇人陪我去食又想食點好呢？😅唯有自己整啦，之前都氹過靚仔老細套吓料，有乜秘訣.....佢講講吓...停咗話....講晒比你聽...我仲使做？😂😂😂，好你唔講我就上網學.....套到有三成料其餘七成試啦，終於整過十次八次後，今次覺得係最好食嘅......連屋企人都係咁話，好。。。即刻記底先，年紀大記憶體唔夠，唔係又唔記得....😜

食譜⬇👇

【清湯腩】

材料：

爽腩  / 坑腩  斤半 (原件切走肥膏)

伊麵              3個

白蘿蔔          2條中（切大塊）

唐芹              2棵

薑片              8片

花椒              1湯匙

八角              2粒

草果              2粒（拍扁）

白胡椒粒      2湯匙

牛湯寶          1粒

冰糖              1湯匙

海鹽              1茶匙

做法：

「1 」牛腩跑活水，即凍水落肉飛水，落2塊薑片，水滾就會有好多肉污糟嘢出嚟，比用熱水飛水更好，之後沖水洗乾淨。

「2 」我用26cm煲，半煲水落餘下薑片，花椒、八角、草果、白胡椒粒、牛湯寶，煲滾20分鐘，再放牛腩，水剛過肉面，如不夠可加水。

「3 」大火煲至滾起落冰糖、鹽，落蓋轉最小火，煲90分鐘，之後唔好開蓋熄火焗90分鐘後，再開蓋落蘿蔔、唐芹，再大火煲滾落蓋轉小火煲60分鐘，之後熄火直至要食。

「4 」煲滾水落伊麵煮約3-4分鐘拎出放碗，牛腩食前先切件鋪上，牛腩湯隔渣，用隔油壺隔油，煲滾試味，淋上碗麵上，食得。