【燉冬菇】

【燉冬菇】

我諗無人會鐘意聽「燉冬菇」呢三個字，不過食就個個讚😋，我由細到大都好鐘意食冬菇，以前响屋企婆婆會一早炆定一大盤冬菇晚夜做餸，現在我哋在職人妻無咁多時間去預備菜式，唯有搵D簡單、直接、方便、方法去顯示我哋不平凡一面比老闆睇(懶係扮吓嘢先😂)，趁放假有時間响屋企就攪呢攪路先（多數都係整定做真空處理既可以保鮮又可以食到住家味），整定D餸一放工返屋企煮兩煮就得，燉冬菇基本工做法其實都係跟一般燉／炆一樣，只是我改用Ball jar做，放入蒸爐蒸1小時45分鐘就得，之後等涼後就可放入雪櫃，因樽內已呈現真空狀態，如未食可放室溫／雪櫃，一、兩個月冇問題，如開蓋了就一定要放雪櫃，每次用要用乾匙拎出，我一樽分三次食，每次用完會再抽真空保存，試過食咗三個月，好彩冇事😅

【燉冬菇】食譜👇😋

【燉冬菇】

冬菇。25-30粒

水。浸過冬菇面

花雕酒。2湯匙

冰糖。15g

生粉。2湯匙

雞粉。1湯匙

鮑汁。2湯匙

做法：

「1」冬菇用大湯碗盛，用水浸過面，上面放落一隻細圓碟紮住D冬菇等佢唔會浮起，30分鐘後應該會軟身，剪去冬菇掟，留冬菇水。

「2」冬菇拎出用生粉撈勻，卒幾卒後沖水乾淨，用另一碗盛起，放入花雕酒、雞粉、冰糖、鮑汁撈勻，再將冬菇水用密網隔篩倒入，撈勻，就可以蒸1小時45分鐘就得。

PS：煮時可要些汁做生粉芡，試味。